May pagkakataon na sa bulsa mismo ng mga pulis na nagpapatrulya nanggagaling ang panggasolina sa hawak nilang patrol cars.

Nangyayari rin na hindi pa umaabot sa lugar na rerespondehan ang patrol vehicle ay naubusan na ito ng krudo. Kaya ang nangyayari, tapos na ang kaguluhan bago dumating sa lugar ang mga pulis.

Pero may mga siyudad at munisipalidad na sinusustinihan ng mga local official ang badyet sa fuel ng mga sasakyang gamit ng pulis. Bagama’t may badyet namang inilaan ang DILG sa patrol vehicles pero hindi ito makasapat.

Kaya umakda ng isang panukalang batas ang mga mambabatas sa Senado na naglalayong ihalo sa krudo ang pinaglutuang mantika o used cooking oil upang maging panggatong.

Sa Senate Resolution 550 ay nakasaad dito na dapat pag-aralan ng Senate Committee on Public Order and Illegal Drugs ang paggamit ng pinaghalong diesel at mantika sa lahat ng patrol cars ng PNP at ng iba pang mga ahensiya ng pamahalaan.

Subok na ang paraang ito sa Lunsod ng Makati, na ang patrol cars ng pulisya sa nasabing lunsod ay gumagamit ng pinaghalong used cooking oil at krudo.

Sa pag-aaral na isinagawa sa naturang siyudad, nakatipid ang pamahalaan doon ng kalahating milyong piso dahil sa nasabing paraan.

Sa pamamagitan ng prosesong isinasagawa sa refinery ay nasasala ang mga pagkaing nakahalo sa mantika maging ang tubig at pararaanin sa cold processing sa loob ng walong oras.

Ang magiging ratio ay 60-40 (diesel-cooking oil), kaya halos walang usok na makikita sa tambutso ng mga sasakyang gumaga mit ng pinaghalong sangkap kapag umaandar ang makina ng sasakyan.